Православный календарь 3 июня (21 мая ст.ст.)

День Святой Троицы. Пятидесятница

В этот день: Русская Православная Церковь отмечает память святых: Равноапп. царя Константина и матери его царицы Елены Блгв. кн. Константина (Ярослава) (1129) и чад его Михаила и Феодора, Муромских чудотворцев (XII). Обретение мощей блж. Андрея Симбирского (1998). Преподобного Кассиана грека, Угличского чудотворца (1504). Собор Карельских святых. Собор Уфимских святых. Преподобномученика Агапита Маркушевского. Свт. Василия, еп. Рязанского. Св. Хоспиция, Триерского (Галл.). Новомч. Пахомия Патмосского, Афонского (Греч.). Сщмч. Секунда и всех кто с ним в Александрии (356). Св. Кирилла, еп. Ростовского (1262). Св. Елены Дечайской в Сербии (1350). Чтимые списки с Владимирской иконы Божией Матери: Псково-Печерская «Умиление», Заоникиевская, Красногорская (Черногорская), Оранская.

Молитвы:

Благословен еси, Христе Боже наш, / Иже премудры ловцы явлей, / низпослав им Духа Святаго, / и теми уловлей вселенную, / Человеколюбче, слава Тебе.

Егда снизшед языки слия,/ разделяше языки Вышний,/ егда же огненныя языки раздаяше,/ в соединение вся призва;/ и согласно славим Всесвятаго Духа.

Днесь светло красуется славнейший град Москва,/ яко зарю солнечную восприимши, Владычице,/ чудотворную Твою икону,/ к нейже ныне мы притекающе и молящеся. Тебе взываем сице:/ о, пречудная Владычице Богородице!/ Молися из Тебе воплощенному Христу Богу нашему,/ да избавит град сей/ и вся грады и страны христианския невредимы от всех навет вражиих,/ и спасет души наша, яко Милосерд.

К Взбранней Воеводе и Заступнице, Деве и Богородице,/ в чистей совести, верою утвердившеся, русстии народи,/ невозвратно надежду имуще, притецем,/ к чудотворному Ей и пречистому образу, и возопием Ей:/ радуйся, Невесто Неневестная.

Взбранной Воеводе победительная,/ яко избавльшеся от злых пришествием Твоего честнаго образа,/ Владычице Богородице,/ светло сотворяем празднество сретения Твоего/ и обычно зовем Ти:/ радуйся, Невесто Неневестная.

Радуйся, святая гора Красная, небеси подобная,/ слава бо Божия на Тебе возсия./ Взыграйте, горы и холми, веселием,/ яко на сей горе икона Божия Матере,/ честнаго Ея умиления, прославися./ Ликуйте, человецы, и веселитеся./ яко нам даровася богатство неотъемлемое, исцелении сокровище,/ гласы, якоже трубы, возшумите,/ прославляюще Ея чудеса преславная./ И Ты, Чистая, радуйся, яко с Тобою Господь.

На горе святей видяще Твою святую икону,/ Богородице, Мати Дево,/ поем Твоего светообразнаго лика изображение,/ поклоняемся Твоей святей иконе,/ почитаем оную,/ и славим той преславная чудеса,/ и сице зовем Тебе:/ радуйся, Невесто Неневестная.

Креста Твоего образ на Небеси видев/ и, якоже Павел, звание не от человек прием,/ в царех апостол Твой, Господи,/ Царствующий град в руце Твоей положи,/ егоже спасай всегда в мире молитвами Богородицы,/ едине Человеколюбче.

Константин днесь с материю Еленою/ Крест являют, всечестное древо,/ всех убо иудеев посрамление суще,/ оружие же на противныя верных людей:/ нас бо ради явися знамение велие/ и во бранех грозное.

Константин днесь весело ликовствует,/ предстоя престолу Святыя Троицы,/ видя отечествие свое, мастию духовною сияющее;/ емуже последоваша Михаил и Феодор, сынове его,/ и молятся вси трие вкупе о душах наших.

Изрядному воеводе и правоверному князю Константину с сынома его вкупе/ отечество его, хваляся, вопиет,/ имеющее его начальника и заступника,/ яко избавльшееся им от прелести и скверны идольския./ Сего ради вопием ему сице:/ радуйся, княже Константине преблаженне.

В тебе, отче Кассиане, известно спасеся еже по образу,/ восприем бо крест и последовав Христови,/ творил еси заповеди Его тщательне./ Темже ныне со Ангелы радуется, преподобне, дух твой.

Днесь град Углеч тобою хвалится,/ в концех бо его пресветло, яко велие солнце, возсиял еси/ и чудесы твоими вся озарил еси,/ и ныне молися Господеви,/ Кассиане преподобие,/ за град Углеч и обитель сию,/ и всяк град, и страну, и люди,/ иже верою тебе почитающия,/ и о спасении душ наших.

Днесь пресветло красуется славнейший Углеч град,/ церковь же Божия Матере вельми радуется,/ имеющи многоцелебныя в себе мощи великаго чудотворца,/ преподобнаго Кассиана, возсиявшаго от Рима,/ якоже солнце, всему миру, издалеча просвещающаго верных сердца,/ имже украси Бог церковь Матере Своей./ Темже ныне молим тя:/ буди покровитель и заступник непобедимый/ от всяких бед граду нашему/ и всем верным хранилище,/ притекающим в дом Божия Матере и кланяющимся тебе,/ преподобие угодниче Христов Кассиане,/ моли Христа Бога спастися душам нашим.

Яко светозарная звезда, пришел еси от востока на запад,/ оставль отечество и княжение твое Христа ради,/ и в царствующий град Москву пришел еси,/ и, промышлением Божественнаго разума направляемь,/ Углеча града достигл еси,/ и, близ его, над Волгою рекою, в пустыни Учме вселився,/ обитель сотворил еси, и церковь созда,/ и созва монахов во спасение;/ с нимиже моли о нас, чтущих память твою, да зовем ти:/ радуйся, преподобие отче Кассиане.

К Богородице со умилением припадем,/ вси грехми обремененнии,/ чудотворную Ея икону Умиление облобызающе/ и вопиюще со слезами:/ Владычице, приими моление недостойных раб Твоих/ и подаждь нам, просящим,/ велию Твою милость.